Një atentat tronditi kryeqytetin pak ditë më parë, ku një sasi tritoli iu vendos makinës që drejtohej nga Preng Gjini. Ky i fundit ka folur nga spitali i Traumës ku është i shtruar si pasojë e dëmtimeve të marra.
Ai ka treguar para oficerëve itinerarin e lëvizjes ditën e atentatit. Preng Gjini ka treguar lokalet ku është ulur dhe ka kryer takime, ndërsa ka pohuar se nuk asnjë hasmëri, apo konflikt me të tjerë.
“Nuk kam asnjë hasmëri dhe konflikte me persona të tjerë. Më është vrarë vëllai, por nuk mbaj përgjegjësi për veprimet e tij.
Gjatë gjithë kohës nuk kam vënë re asnjë detaj të dyshimtë. Gjithmonë lëvizja i vetëm dhe nuk kisha frikë që të ruhesha.
Makinën ia merrja shpesh kushëririt, pasi me të kam marrëdhënie të mira”, ka qenë deklarata e Preng Gjinit para oficerëve të policisë.
Lënda plasëse ishte vendosur sipër gomës së parë, në pjesën e pasagjerit, ku shënjestra ishte pikërisht Gjini.
Lënda plasëse mendohet të jetë vendosur aty, pasi makina me të cilën po lëvizte ishte e kushëririt dhe ai ishte shpesh pasagjer në automjet.
Që pas vrasjes së të vëllait, 51-vjeçari jetonte thuajse i fshehur në Tiranë, ku lëvizjet e tij ishin shumë të pakta, dhe pjesën më të madhe të kohës ishte në shoqërinë e kushëririt të tij.
Preng Gjini është vëllai i Armando (Tonin) Gjinit. Ky i fundit u vra në atentat në 12 gusht 2019 në Rrëshen. Armando Gjini u ekzekutua para syve të dy fëmijëve të tij në Rrëshen, në gusht të vitit të shkuar. Familja Gjini është e njohur për përfshirjen në trafikun e drogës dhe viktima konsiderohej si “ushtari” i Met Kananit, gjithashtu i përfshirë në këtë trafik.
