“S’kam burrë e fëmijë, më rrahën dhe më hodhën përtokë”/ 70-vjeçarja tregon momentet e tmerrit

Detaje tronditëse janë hedhur në dritë nga grabitja e 70-vjeçares Mrik Ndoja në Kishagji të Pukës. Autorët kanë hyrë nga pjesa e pasme e banesës, dhe i kanë shkuar tek krevati të moshuarës. Më tej e kanë lidhur dhe i kanë kërkuar paratë.

Burimet bëjnë me dije se 70-vjeçarja e tmerruar për çfarë po ndodhte, u ka treguar vendin ku kishte librezën e pensionit, pasi kishte tërhequr lekët për 3 muaj. Përpos tyre, grabitësit i kanë marrë edhe disa para të tjera të moshuarës.

70-vjeçarja nuk mundi të reagonte, pasi kishte një frakturë në këmbë, teksa autorët e maskuar e goditën atë në krahun e majtë, brinjë dhe kokë.

Më pas, Mrik Ndoja njoftoi komshinjtë të cilët e ndihmuan dhe njoftuan ambulancën. “Më hodhën përtokë. Më thanë ku ke paratë. Po për Zotin, më rrahën. Në krah kam dëmtime. Më morën me shkelma. Nuk e di sa ishte ora. Zoti më ka zgjidhur. Nuk e di, me dhimbje jam zgjidhur. Nuk i njoh autorët. Çfarë të them? Thirrja ime është që të gjejnë autorët. S’kam bërë keq, s’kam dhunuar kënd. S’kam burrë e fëmijë. Kam frikë të jetoj këtu”, tha ajo për “News 24”.