Kryeministri Rama i është përgjigjur aktit të fundit të kreut të shtetit, Ilir Meta, për të çuar në Gjykatën Kushtetuese çështjen e Teatrit. Meta kundërshton vendimin e qeverisë së pak ditëve më parë, që i kaloi pronësinë e Teatrit Kombëtar Bashkisë së Tiranës, e cila sot e futi në rendin e ditës së mbledhjes së Këshillit Bashkiak për ta shembur.
Në studion e emisionit “Opinion”, Rama tha se ndonëse nuk dëshironte të bënte polemikë me presidentin, askush nuk ka shans ta ndalojë veprimtarinë e pushtetit ekzekutiv. Kreu i qeverisë u shpreh me ironi se Meta nuk është as drejtor i urbanistikës, as kryetar i Bashkisë.
“Nuk dua të bëj polemikë me presidentin, nuk është as drejtor i urbanistikës, as kryetar i Bashkisë dhe nuk ka tagër të vendosi për kompetenca të këtyre instancave.
Ka të drejtën të mendojë ndryshe, ka të drejtën të bëjë ato që i sheh të arsyeshme brenda kornizës së vet të veprimit. Por jo presidenti, por asnjë tjetër që nuk ka mandat dhe nuk ka kontratë me popullin shqiptar për të bërë detyrat që i takojnë një qeverie, nuk ka shans ta ndalojë veprimtarinë e pushtetit ekzekutiv.
Nuk jemi në kushtet e një historie të re. Jemi në kushtet e një episodi të ri, në një histori të mbushur me episode”, përfundoi ai.
