Kreu i Bindjes Demokratike, Astrit Patozi, në një intervistë për ‘Fjala’, ka folur për marrëdhënien e tij me ish-kryeparlamentaren Jozefina Topalli. Ai ka nënvizuar faktin se me Topallin ka një marrëdhënie korrekte dhe miqësore, por mbi të gjitha sipas tij, parimore.
Jozefina Topalli u shkëput nga jeta aktive politike, pas përjashtimit nga Lulzim Basha në listat e 2017. Ish-nënkryetarja demokrate pati disa dalje publike ne atë kohë, ku bashkë me eksponentë të lartë të PD-së kërkuan shkarkimin e Bashës.
Por koha tregoi se rrugët u ndanë shumë shpejt, dhe ish-funksionarët e PD-së bënë zgjedhjet e tyre. Astrit Patozi krijoi një parti të re, po kështu edhe Jozefina Topalli. Më herët ajo është shprehur se në 25 prill, s’do ketë më një Shqipëri të Bashës, Metës e Ramës. Por duhet një qeveri e dalë nga votat, dhe një opozitë që s’korruptohet për interesa të liderit.
-Si është marrëdhënia juaj me Jozefina Topallin. Tashmë edhe ajo ka një lëvizje të re politike.
“Marrëdhënia jonë është korrekte, miqësore por mbi të gjitha parimore. Që do të thotë, nuk ka shumë rëndësi marrëdhënia ime personale me Jozefina Topallin, sesa vlerat apo parimet që ne ndajmë së bashku dhe që ne na bashkojnë në një pikë. Dhe kjo pika është ndryshimi, dhe jo thjesht rrotacioni apo stanjacioni.
Në këtë kontekst, do ishte luks i madh që të mos bashkëpunosh me Jozefina Topallin dhe me këdo tjetër aktor të ngjashëm, për t’ia lënë vendin një alternative të besueshme dhe pse jo, për të bashkuar edhe fuqinë elektorale në funksion të Kodit.
Kodi elektoral e favorizon koalicionin. Dhe forcat politike të shpërndara secila më vete, sigurisht që i zvogëlojnë shanset njëra-tjetrës për të pasur një produkt pozitiv”.
