Zvicra është një nga vendet jo vetëm më të pasura, por edhe më të bukura në botë. Peisazhet e saj malore, tërheqin çdo vit miliona turistë. Për këtë arsye, vendi ka një sistem hotelier të përsosur. Por 2 zviceranë, kanë ndërtuar hotelin ndoshta më unik në botë.
Ai ofron një panoramë fantastike të majave të maleve, por nuk është një godinë normale. Në fakt, me përjashtim të një krevati të rehatshëm, hoteli “Null Stern” (Zero Yje), nuk ka as mure, dyer, dritare apo çati mbi krye. Edhe pse qëndrimi aty i ngjan më shumë një kampingu në natyrë, çmimi për një natë shkon nga 200 në 300 dollarë.
Vetë emri i hotelit, duket disi ironik. Ai nuk ka asnjë yll, pasi ylli është vetë ai që fle aty. “Null Stern” e nisi aktivitetin në korrikun e vitit 2016, në lartësinë 1970 metra mbi nivelin e detit. Siç mund të pritet, hoteli tejet modest në arredim, nuk ka banjo private.
Një banjo publike ndodhet rreth 5 minuta ecje më këmbë poshtë malit, thonë 2 pronarët e tij. Ata janë edhe shërbyesit e vetëm në këtë hotel të veçantë. Ata gatuajnë, madje u japin vizitorëve edhe lajmet më të fundit, për të kompensuar mungesën e televizorit. Për fat të mirë, nëse moti është i keq, klientët mund të anulojnë rezervimet e tyre në minutën e fundit.
TIRANA TODAY
