Ish-kryeministri Sali Berisha ka komentuar deklaratat e deputetit kristiandemokrat, Gunther Krichbaum, i cili tha në një intervistë për DW se Gjermania do të ndërpresë marrëdhëniet me PD nëse kthehet te e shkuara.
Deputeti kristiandemokrat në Parlamentin Gjerman, Gunther Krichbaum, folës i grupit parlamentar CDU/CSU për çështje të Bashkimit Evropian, e bëri të qartë se ata nuk do të bashkëpunojnë me PD, nëse i kthehet të djeshmes, duke iu referuar ish-kryeministrit Sali Berisha.
Pra, ju do ta refuzoni PD-në, nëse në krye të saj vjen Sali Berisha?
“Besoj se u shpreha qartë ashtu siç e thashë. Partia lipset të marrë një vendim të mençur dhe të marrë parasysh efektin në planin ndërkombëtar, nëse në të vërtetë ndjek pretendimin se jo vetëm dëshiron të bashkëpunojë në nivel ndërkombëtar, por edhe të marrë në dorë drejtimin e vendit. Ky është qëllimi legjitim i një partie në demokraci: që të vijë në pushtet e të formojë qeverinë. Unë mendoj se amerikanët kanë gjetur fjalë të qarta dhe mendoj se partia bën mirë që fjalë të tilla të mos i lërë pa i dëgjuar”.
Marrë shkas nga kjo deklaratë, Berisha e cilësoi si personale
“Së pari shumë thjesht, ai ishte angazhim personal. Unë në qëndrimet personale të individëve nuk ndërhy. Por cili është komenti im? Keqardhje që një deputet i Bundestagut i lejon vetes se mund të ndërhyjë në një proces të lirë, te një parti simotër. Aq më tepër kur ai e bën këtë mbi një vendim që është faktuar që është marrë nga lobimi korruptiv i Edi Ramës dhe Xhorxh Soros. Ftoj zotin Krichbaum që të marrë një hetim në të gjitha arkivat e shtetit të tij, nëse mund të gjejë një provë të vetme, për të faktuar atë shpifje dhe trillim të Xhorxh Sorosit, unë do ta vlerësoja”, u shpreh Berisha.
