Zjarret në Australi janë një nga shqetësimet më të mëdha në ditët që flasim, në rang global.
Mijëra hektarë tokë janë përfshirë nga zjarret dhe mbi 1 miliardë kafshë janë djegur për së gjalli, si pasojë e situatës së rënduar. Shkaqet që kanë çuar në përhapjen e këtyre zjarreve janë të shumta, por ai i zbuluar kohëve të fundit është mjaft interesant dhe i rrezikshëm në të njëjtën kohë.
Mediat e huaja bëjnë me dije se skifterët në Australi po bëhen shkak i përhapjeve të këtyre zjarreve në shumë zona.
Ata marrin shkopinj që po digjen dhe i hedhin ato në fusha të thata. Sipas National Geographic, deri në vitin 2018 kjo sjellje e këtyre shpendëve mendohej të ishte e rastësishme, por zbulimet e fundit kanë dalë në një tjetër konkluzion.
Aktivisti Phillip Waipuldanya Roberts, i cili mori pjesë në këtë studim shprehet se skifterët e bëjnë këtë veprim, për të trembur prenë e tyre dhe për ta bërë atë sa më të ekspozuar.
“Unë kam parë një skifter të marrë një shkop duke u djegur në kthetrat e tij dhe ta hedh në një copëz të freskët me bar të thatë, gjysmë milje larg, pastaj të presë eksodin e çmendur të brejtësve dhe zvarranikëve të djegur dhe të frikësuar nga zjarri. Kur ajo zonë u dogj, procesi u përsërit diku tjetër. Ka të bëjë me ushqimin, sepse nga këto kullota dalin zogj të vegjël, hardhucë, insekte, gjithçka që ikën përpara zjarrit”, tha ai.
