Siç duket, jo vetëm këngëtari Ardit Çuni ka shfaqur pakënaqësi me mënyrën e votimit të “Këngës Magjike”, por zëri i radhës i shtohet edhe Xheisara. Juria ia justifikoi skualifikimin nga festivali me arsyetimin e gabimeve intonative në të kënduar. Këngëtarja, mjaft e zhgënjyer zbuloi në emisionin “Thumb On” në “RTV Ora” se ajo performon prej tre vitesh në një nga lokalet e kryeqytetit përkrah divës së muzikës shqiptare, Aurela Gaçe. Madje ajo shtoi më tej dozën e ironisë, duke iu drejtuar të gjithë atyre që ajo i cilëson si ‘lëpirës’.
“Kam tre vite që këndoj në një nga lokalet më të mira në Tiranë, dhe pranë një ndër divave të Shqipërisë, Aurela Gaçe. Për aq kohë sa jam e përzgjedhura e Aurela Gaçes, unë kam gjithë botën. Nëse ka një njeri që i përulem është Aurela Gaçe. Nëse ajo do të ma jepte këtë verdikt, nuk do të isha mërzitur fare. Unë nuk fus miq. Nuk jam tip lëpirës. Vetëm nga fakti që unë marr pjesë në një kompeticion, unë dua të ta vërtetoj ty që këtë pjesëmarrje e kam timen dhe do ta marr me drejtësinë time. Nuk mund të vi të lëpihem ty se je juria. Unë nuk e kam bërë, dhe personalisht unë nuk kalova”.
Xheisara zbuloi edhe telefonatën që pati me Aurelën pas daljes nga Pallati i Kongreseve. Aurela Gaçe e ka komplimentuar për prezantimin dinjitoz. “5 minutëshin e parë që dola, më mori në telefon dhe më tregoi disa gjëra që më shërbyen. Më tha bravo të qoftë për prezantimin që bërë”.
E vetmja gjë që e ngushëllon në këtë histori, është fakti që nuk ju dha shansi për të votuar, pasi siç tregon ajo, në garë kishte kolegë dhe miq. “Suksese fitueses. Shyqyr që nuk pata mundësi të votoja, do të isha therur me gjysmën. Janë bërë shumë gabime këtë herë në “Këngën Magjike”. Më ka ardhur keq për disa artistë”.
Ajo u shpreh e zhgënjyer nga Jonida Maliqi, e cila nuk e votoi interpretimin e saj LIVE. “Më thuaj një nga këngëtarët që nuk stonoi, edhe e nxori këngën pikë e presje siç e ka aty në YouTube. Që të më drejtohet mua dikush dhe të më thotë ti nuk e bëre, çohu ti dhe hajde në vendin tim.
E prisja nga të gjithë ata, nga Jonida Maliqi nuk e prisja kurrë. Sepse siç e tha ajo vetë, unë kam pasur një marrëdhënie tjetër. Në një kompeticion tjetër, ajo më ka mbështetur dhe realisht më ka mbështetur shumë faleminderit. Deri në një pikë dhe ndodhi prapë si kësaj radhe. Presioni ka qenë i madh në “Këngën Magjike”.
Që në momentin që “Kënga Magjike” është bërë LIVE dhe mbrapa kushdo që do të ishte në juri, do më jepte sugjerime ose do më këshillonte për diçka të mirë. Do ja pranoja, por njerëz që nuk kanë kënduar asnjëherë LIVE në skenën e “Këngës Magjike”, s’mund të më gjykojë, sepse nuk e kanë provuar vetë”.
