Greqia i shtohet listës së vendeve ku vala e dytë e pandemisë po rrezikon popullatën. Autoritetet shendetësore në Greqi, menjëherë kanë rikthyer masat e ashpra, si një mënyrë për mos përhapjen e koronavirusit vdekjeprurës. Në Greqi janë 23.947 të infektuar dhe kanë ndërruar jetë 482 persona.
Pas rritjes së numrit të infektimeve, sot është izoluar qyteti i Kozanit. Sekretari i Përgjithshëm për Mbrojtjen Civile, ka thënë se rajoni është në “kërcënim në rritje” dhe masat hynë në fuqi ditën e sotme dhe do të zgjasin deri më 29 tetor.
Masat në fjalë përfshijnë përdorimin e detyrueshëm të maskave ngado, ndalimin e grumbullimit të njerëzve dhe ndalimin e udhëtimit jashtë qytetit.
Po kështu do të mbyllen dyqanet, palestrat, gjykatat, restorantet, kinematë, festivalet e muzikës, muzetë dhe vendet arkeologjike. Shkollat do të vazhdojnë të zhvillohen për nxënës dhe mësues, të cilët duhet të jenë të pajisur me maska, ndërsa mësimi në universitete do të zhvillohet online.
