Ballkani, i gjendur një një situatë të nxehtë para dhe pas zgjedhore, me konflikte të hapura ose gati për të shpërthyer, po tërheq dukshëm vëmendjen e institucioneve ndërkombëtare. Pas prekjes nga afër të aktualitetit në rajon nga zyrtari i lartë amerikan, BE kërkon të balancojë nivelin e interesimit, duke thirrur në tryezë, në Bruksel, liderët e gjashtë vendeve të Ballkanit Perëndimor.
Sipas zyrës së përfaqësueses së lartë të Bashkimit Evropian për politikë të jashtme dhe siguri, Federica Mogherini, kjo e fundit ka ftuar në një takim më datë 24 Maj në Bruksel, liderët e Shqipërisë, Kosovës, Bosnjë-Hercegovinës, Maqedonisë, Malit të Zi dhe Serbisë, me qëllim diskutimin dhe gjetjen e mënyrave për kapërcimin e tensioneve në rritje dhe përshpejtimin në proceset integruese.
Kujtojmë që, Maqedonia gjendet në një situatë paszgjedhore ende të pakonstituuar, të karakterizuar nga një polarizim i frikshëm politiko-etnik, Kosova në prag të zgjedhjeve të parakohshme, Shqipëria gjithashtu në prag të zgjedhjeve të përgjithshme, Bosnjë-Hercegovina nën kërcënimin e ndarjes mbi baza etnike, (problem ky i evidentuar edhe nga monitorimi i fundit i SHBA-ve), etj.
