Ministria për Evropën dhe Punët e Jashtme ka reaguar lidhur me situatën e krijuar në pikën e kalimit kufitar me Greqinë, në Kakavijë.
MEPJ sqaron se gjatë ditëve të fundit ka pasur fluks të shtuar qytetarësh në dalje të Republikës së Shqipërisë. Sipas saj shkak i vonesave janë bëre kufizimet në orarin e funksionimit të Pikës së Kalimit Kufitar nga pala greke dhe mungesa e kapaciteteve mjekësore të palës greke në testimin e udhëtarëve.
Në njoftim sqarohet se pala greke ka njoftuar se do të marrë masa të tjera për lehtësimin e situatës deri në heqjen e detyrimit për bërjen e testit.
“Siç edhe është njoftuar, gjatë ditëve të fundit kalimi lejohet vetëm në orarin 06:00 deri 22:00 ora shqiptare. Ndërkaq, në Pikën e Kalimit Kufitar Kakavijë, ka fluks të shtuar per shkak se qytetarët janë detyruar të kryejnë procedurën e testimit COVID nga ana e autoriteteve shëndetësore greke të cilët po kryejnë testimeve masive.
Në pikat e tjera kufitare pala greke nuk kryen procedura hyrje/dalje, për mjete dhe shtetas, por procedon vetëm raste urgjente.
Me qëllim përballimin e situatës dhe lehtësimin e lëvizjes që qytetarëve shqiptarë janë kontaktuar në vijimësi autoritetet greke të cilët kanë shtuar personelin shëndetësor në Pikën Kufitare të Kakavijës. Së fundi pala greke ka njoftuar se do të marrë masa të tjera për lehtësimin e situatës deri në heqjen e detyrimit për bërjen e testit.
Risjellim në vëmendje se shtetasit shqiptarë mund ta kryejnë testin edhe në institucionet e licencuara shqiptare dhe ta përkthejnë përgjigjen në anglisht. Ky testim njihet edhe nga autoritetet greke dhe do ta lehtësonte më shumë situatën”, thuhet në njoftimin e ministrisë.
