Duke iu referuar situatës së zjarreve në vend, Ministrja e Mbrojtjes, Olta Xhaçka, tha në një prononcim për mediat se këto zjarre janë akte kriminale, pasi janë të ndezur qëllimisht. “Këto zjarre janë akte kriminale, të ndezur qëllimisht, akte të tilla shkatërrojnë pronën e përbashkët e synojnë të krijojnë pasiguri”.
Sipas ministres, situata është shqetësuese, ku mesatarisht janë 8 vatra zjarri në ditë. “Gjatë muajit Mars janë shënuar plot 243 vatra zjarri, të shpërndara gjeografikisht në pothuajse të gjithë territorin e vendit.
Mesatarisht, 8 vatra zjarri në ditë, edhe pse temperaturat kanë qenë nën 20 gradë, e madje në shumë prej këtyre zonave shumë më poshtë se aq. Vjet, në të njëjtën kohë ky numër ka qenë 0, edhe pse kushtet atmosferike kanë qenë të ngjashme. Dhe sado të kthehesh mbrapsht në vite, nuk mund të gjesh një vit tjetër me këtë frekuencë zjarresh”.
