Pas Shqipërisë, është shënuar edhe viktima e parë nga flakët në Kosovë. Një person ka humbur jetën në Malishevë, si pasojë e flakëve. Sipas raportimeve, viktima ishte futur në stallë, në momentin kur u përfshi nga flakët.
Policia raporton se vdekja ishte shkaktuar si pasojë e asfiksimit. “Si pasojë e kësaj vdekje dyshohet të jetë ajri i tymosur, pasi që viktima kishte shkuar tek stalla e cila ishte përfshirë nga zjarri”, konfirmon policia e Kosovës.
Viktima, identiteti i të cilit nuk bëhet i ditur, ishte dërguar pa shenja jete në qendrën mjekësore të Malishevës, ku fatkeqësisht nuk ka mundur të mbijetojë.
Dje në Gjirokastër u shënua edhe viktima e parë në Shqipëri, 64-vjeçari Andrea Haxhiaj. 64-vjeçari nga fshati “Asim Zeneli” në Gjirokastër, u dogj dhe për pasojë humbi jetën në banesën e tij.
Policia bëri me dije se 64-vjeçari Andrea Haxhiaj dhe bashkëshortja e tij po tentonin të shuanin zjarrin në vreshtin e oborrit të shtëpisë. 64-vjeçari nga asfiksia humbi jetën, ndërsa bashkëshortja e tij 57-vjeçe ka marrë djegie të rënda në trup, ku menjëherë u dërgua me urgjencë në spitalin e Gjirokastrës.
Ndërkohë situata në Lunxheri duket se ka qenë mjaft kritike, ku Ministri i Mbrojtjes Niko Peleshi kërkoi bashkëpunim të banorëve me strukturat shtetërore, për të zbatuar urdhrin e evakuimit në 3 fshatra të rrezikuar, “Krin”, “Asim Zeneli” dhe “Arshi Lengo”. Ai deklaroi se situata është shumë e vështirë, prandaj duhet bashkëpunim, në mënyrë që të shmangen dëmtime të tjera.
