Ish-deputeti demokrat, njëherazi sipërmarrësi i suksesshëm, Agron Shehaj, ka reaguar së fundmi lidhur me padinë për mashtrim që biznesmeni i njohur turk Adnan Polat ka ngritur ndaj aksionerit mazhoritar të “Air Albania”, Sinan Idrizit.
Prishi marrëveshjen duke e futur në kurth, bosi turk padit aksionerin e Air Albania
Presidenti i Flamurtarit, Idrizi, do të përballet me një proces gjyqësor në Turqi pasi dyshohet se ka mashtruar për një shumë të madhe parash Adnan Polat.
Ky i fundit, i njohur si bosi i skuadrës së futbollit Gallatasarai ka dorëzuar në Prokurorinë e Stambollit një kallëzim penal në emër të kompanisë së tij “Grupi Polat”, ku pretendon se kishte rënë dakord me Idrizin që të blinin një kompani nafte, por Idrizi e ka mashtruar duke i marrë 3.5 milionë USD.
Ndërkohë Shehaj, përmes një postimi në Facebook bën thirrje që SPAK të hetojë urgjentisht lidhjet Rama-Idrizi dhe mënyrën se si u bë Idrizi ortak i shtetit.
Sipas ish-deputetit demokrat, kryeministri Edi Rama e bëri Sinan Idrizin ortak me shtetin vetëm sepse ai ishte njeriu i duhur për ta mbuluar atë.
“Nuk ka asnjë dyshim që Sinan Idrizi u vu aty vetëm për të shërbyer si mbulesë për vetë Edi Ramën. 41% të aksioneve të Air Albania janë të Edi Ramës”, shkruan ndër të tjera Shehaj.
Postimi i plotë: “Sinan Idrizi, një person që Edi Rama e vendosi si ortak me 41 % të aksioneve të kompanisë shtetërore Air Albania, akuzohet për mashtrim prej miliona euro.
Këtë të akuzuar për mashtrim, pa asnjë aktivitet biznesi, pa asnjë burim të deklaruar parash, Edi Rama e bëri ortak me shtetin vetëm sepse ai ishte njeriu i duhur për të mbuluar Edi Ramën.
Nuk ka asnjë dyshim që Sinan Idrizi u vu aty vetëm për të shërbyer si mbulesë për vetë Edi Ramën. 41 % të aksioneve të Air Albania janë të Edi Ramës.
Është koha që SPAK të hetojë urgjentisht lidhjet Rama-Idrizi dhe mënyrën se si u bë Idrizi ortak i shtetit”.
