Një skandal financiar me tenderat publikë përgjatë pandemisë së koronavirusit ka shpërthyer në Zimbabwe (Afrikë), duke u shtrirë deri në Tiranë.
Ministri i Shëndetësisë së Zimbabwe, Obadiah Moyo është arrestuar dy ditë më parë për aferën prej 60 milion dollarësh, ndërsa është shpallur në kërkim biznesmeni shqiptar Klodian Mërtiri i cili ishte prezantuar si Ilir Dedja.
Moyo është liruar sot pasi ka dhënë një garanci pasurore prej 50 mijë dollarësh.
Ndërsa mediat në vendin afrikan shkruajnë se një ditë më parë është arrestuar edhe Dalish Nguvaja, mik i djalit të presidentit të vendit, i dënuar më parë për pastrim parash që thuhet se është edhe partneri i biznesmenit shqiptar Ilir Dedja (Klodian Mërtiri).
Biznesmeni shqiptar i prezantuar në Zimbabwe si Ilir Dedja, ka deklaruar se kishte kombësi shqiptare dhe kishte pashaportizimin në Itali dhe si aksioner i kompanisë DRAX SAGL.
Në artikull thuhet se Ilir Dedja, përmes dy kompanive të regjistruara në Zvicër dhe Dubai, Drax Consult SAGL dhe 3-DD Swiss Trading, ka lidhur dy marrëveshje me qeverinë e Zimbabwe për blerjen e materialeve mjekësore gjatë pandemisë, me vlerë 20 milionë USD dhe 40 milionë USD, vlerë kjo 10 herë më e lartë se ajo e tregut.
Në datë 5 Mars kompania e Ilir Dedjas mori një pagesë prej 2 milionë dollarësh nga qeveria e Zimbabwe, gjë që ngriti hetimet.
Kur pagesa iu referua Interpolit, kompania hapi një degë të re në Dubai, nga ku i dërgoi Zimbabve një faturë të re me gati 1 milion dollarë amerikanë.
Media afrikane shkruan se ndaj biznesmenit shqiptar rëndon akuza për mashtrim në shifrat që i ka paraqitur qeverisë së Zimbabve në raport me vlerën reale të saj, ndërkohë që dy kompanitë e tij nuk figurojnë të regjistruara në këtë shtet, shkruan “abcnews.al”.
