Temperaturat e larta mbeten shqetësimi kryesor në stinën e verës!
Shpeshherë ambienti brenda shtëpisë është më i nxehtë se ai jashtë dhe krahas kondicionerëve, ka alternativa të tjera jo të kushtueshme që mund t’i praktikoni.
Kësisoj, nëse jeni në kërkim të zgjidhjeve pa shumë kosto, atëherë po lexoni artikullin e duhur!
Fillimisht, sjellim në vëmendjen tuaj faktin se është më e lehtë të ruash një temperaturë konstante në shtëpi sesa të përpiqesh të ulësh temperaturën që ajo ka marrë tashmë nga vapa.
Pra, mbani dritaret dhe dyert e dhomave hapur përgjatë gjithë natës deri në orët e para të mëngjesit.
Në mëngjes hapni edhe derën e shtëpisë.
Pasi shtëpia është freskuar deri në mëngjes dhe tashmë temperatura brenda është më e ulët se jashtë, mbyllni dritaret dhe derën.
– Gjatë kohës së drekës, kur temperaturat janë edhe më të larta, vendosni një copë të errët tek dritaret për të penguar direkt dritën e diellit.
– Pas perëndimit të diellit, nëse shtëpia ju duket më e nxehtë se jashtë, vendosni freskuesen apo ventilatorin (nëse keni) përballë dritares. Kjo do të bëjë që nxehtësia të largohet gradualisht nga dhoma/shtëpia.
– Evitoni sa të mundeni përdorimin e sobës dhe furrës.
E gjithë nxehtësia jo vetëm që do i japë një ndjesi lodhjeje personit që gatuan në familje, por do rrisë dhe temperaturën e gjithë shtëpisë. Kërkoni për receta verore, të thjeshta dhe pa shumë mundim.
Këshilla e fundit, që ndoshta s’ka shumë lidhje me “shtëpinë e freskët”, por ka të bëjë më shumë me shëndetin tuaj është: PINI SA MË SHUMË UJË!
