Mëngjesin e sotëm iu bë për herë të tretë atentat Ardjan Çapjas.
55-vjeçari mori një plumb në shpatullën e majtë, ndërsa aktualisht ndodhet në Spitalin e Traumës, ku iu nënshtrua një operacioni.
Gazetarja Klodiana Lala në emisionin “Real Story”, foli së fundmi për gjendjen e tij aktuale.
Ajo deklaroi se Ardjan Çapja është ende në gjendje kritike për jetën.
“Pak minuta më parë kam pasur kontakte me grupin e hetimit, më thonë që gjendja e Ardjan Çapjas është kritike, po flitet për intubim”, u shpreh Lala.
“Nuk është në dukje atentat mafioz, është mirëfilli atentat mafioz. Kemi patur dhe vrasjen e Mirditës me snajper. Familja Çapja është e vendosur në pjesën fundore të Elbasanit, janë 4 vila.
Në rrugë është hotel Univers. Kemi tentuar të filmojmë afër shtëpisë së Çapjas. Edhe sot, ishin të irrituar. Nuk mirëprisnin gazetarët. Aq më tepër pamjet nga vilat e tyre. Nga pjesa kryesore ato nuk kanë fushëpamje.
Ka dyshime të forta si është qëlluar. Pasi është bërë një kqyrje momentale, nuk kishte një automjet, nuk kishte as gëzhoja.
Gjithë dyshimet ishin që është qëlluar nga distanca. 250 m në vijë ajrore dhe ka qenë i pozicionuar në Kodrën e Krastës. Dhe aty janë dy banesa të braktisura.
Aty janë dyshimet, pasi pjesa tjetër kontrollohet nga Çapjat. Personat e kanë ruajtur dhe e kanë qëlluar në shpatull të majtë”, vijoi ajo.
