Mbrëmjen e djeshme, ish-policit 26-vjeçar Santiago Malko i preu rrugën një furgon i bardhë. Dy persona hapën zjarr ndaj tij, duke bërë që Malko të humbë drejtimin e makinës BMW, duke dalë nga rruga. Policia ka gjetur në vendin e ngjarjes 9 gëzhoja kallashnikovi. Autorët kanë ndjekur çdo lëvizje të ish-policit.
I ndjeri udhëtonte i vetëm me një fuoristradë BMW X5, dhe e kanë qëlluar në momentin kur ai ka dalë nga një lavazh, në rrugën “Xhanfize Keko”, në orën 22 e 20 minuta. Autorët e kanë qëlluar me breshëri nga pjesa e përparme, dhe nga ana e pasagjerit.
Malko kishte përfunduar kursin për Patrullë të Përgjithshme, dhe ka qenë pjesë e kësaj strukture në Policinë e Tiranës vetëm për 3 muaj, më pas është tërhequr vetë nga policia. Bashkëshortja e tij, Dea Riçku, me origjinë nga Dibra, ka qenë pjesë e Policisë së Tiranës, në njësinë “Shqiponja”.
Edhe ajo është tërhequr nga policia, pas problemeve që pati në vitin 2016 Santiago Malko, ku u përfshi në një ngjarje të rëndë kriminale. Dy vëllezër dhe ish-polici Malko u përplasën fizikisht, vetëm disa metra larg Drejtorisë së Policisë së Tiranës mbrëmjen e datës 14 prill 2016. Atë kohë burimet thanë se konflikti dyshohej të kishte ndodhur për shkak të një borxhi të pakthyer.
