Pas vendimit që dha dje Apeli i GJKKO-së, duke e dënuar me 3 vite e 4 muaj burg, ish-ministri i Brendshëm Saimir Tahiri e kaloi natën në burgun 313. Nga gjykata ai shkoi tek Drejtoria e Policisë dhe më pas u drejtua për në burgun 313, ku dhe kaloi natën në godinën nr.2. Gjatë natës, ish-ministrit i janë lejuar në qeli vetëm cigare dhe rroba.
Ambasada e SHBA-së gjatë 4 viteve ka ndjekur procesin hetimor e gjyqësor ndaj tij, duke dërguar në sallën e gjyqit përfaqësuesit e saj. Madje dhe dje përfaqësuesit e ambasadës kanë qëndruar në sallë gjatë gjithë ditës.
Provat e prokurorisë ndaj Tahirit ishin shumë të pakta për ta “implikuar në trafik droge” apo “përfshirje në grup të strukturuar kriminal”. Dënimi për “shpërdorim detyre” u dha pasi gjatë kohës së Tahirit, vendi u mbulua nga kanabisi dhe dyshimet janë se ish-ministri ka favorizuar një gjë të tillë.
Amerikanët dhanë dje një mesazh të fortë për të gjithë klasën politike, se askush nuk ia hedh dot për krimet e kryera!
