Festat e fundvitit po afrojnë, por ajo çfarë është shqetësuese është kurba në rritje e të infektuarve. Prej javësh, Shqipëria nuk po sheh shenja përmirësimi, e po kështu edhe bilanci me viktimat është mjaft i rëndë. Ndryshe nga vitet e tjera, shqiptarët do iu duhet të bashkëjetojnë me pandeminë, sikundër e gjithë bota, por me rregulla të reja.
Gazetari Blendi Fevziu e ka pyetur mbrëmjen e djeshme në “Opinion” Ministren e Shëndetësisë, Ogerta Manastirliu, nëse shqiptarët do të festojnë sivjet.
Ministrja tha se fatmirësisht të gjithë do të festojnë në familje, por nuk është një opsion grumbullimet si dikur.
Do e hamë Vitin e Ri rehat këtë vit znj. Manastirliu, apo me kufizime?
Është në dorën tonë z. Fevziu, por patjetër që do të jemi në kushtet e kërkesave të kohës, por themi, në normalitetin e ri. Do të kërkohet dhe do të vijojë të kërkohet shmangia e të gjitha kontakteve jo të domosdoshme, por do të jemi në familje.
Te familja e vogël, se shqiptarët janë mësuar të mbledhin disa familje bashkë për Vit të Ri…
Padyshim që duke respektuar të gjitha rregullat do të gëzojmë dhe do të shpresojmë që viti tjetër të jetë shumë më efektiv dhe jam e bindur që do të jetë shumë më i mirë dhe për arsyen tjetër që vaksina do të vijë edhe në Shqipëri.
