3 mijë lekë të reja, ky ishte shpërblimi i vendosur nga qeveria për pensionistët. Si çdo vit qeveria miratoi buxhetin për ta shpërndarë te ata me rastin e festave të fundvitit. Ministrja e Financave Anila Denaj, bëri me dije se këtë bonus do ta përfitojnë 663 mijë pensionistë, të të gjitha kategorive. Përfshi edhe ata që marrin pension invaliditeti apo ata që janë jetimë, etj.
Teksa pensionistët në vendin tonë edhe pse kanë punuar thuajse gjithë jetën e tyre, sërish pensioni që marrin për pjesën më të madhe të tyre është shumë i ulët. Ndaj, edhe kërkojnë që shpërblimi nga qeveria të paktën për periudhën e fundvitit, të jetë më i lartë.
“Shumë i pakënaqur jam, sepse ato as për një karamele nuk dalin. Në vendet e Europës pensionistët marrin nga 1 mijë euro. Sepse ata janë më fukarenjtë. Unë nuk do t’i marr fare, nuk kam për çfarë i dua. Le t’i mbajë Edi Rama e të blejë ndonjë palë këpucë.”
“Do marrim ndonjë pulë dhe kaq. Të kënaqur ne nuk jemi kurrë, por të paktën edhe aq. Sepse mund të mbeteshim edhe pa to.”
“Të paktën nuk na harruan, por prapë ku t’i çojmë më parë ne ato. Asnjë gjë nuk mund të bësh me 30 mijë lekë.”
“Janë shumë pak, sepse me aq vetëm gjysmë gjeli mund të marrim. Të kishim më shumë, sepse të marrësh e një raki a birrë, nuk është keq.”
Pavarësisht se 2019-ta nuk ishte aspak një vit i lehtë për vendin dhe ekonominë, veçanërisht nga pasojat e tërmetit; disa prej pensionistëve shprehen për Tirana Today se e mirëkuptojnë vendosjen e një shpërblimi relativisht të ulët.
“Tani duke parë edhe kushtet pasi ndodhi e tërmeti, mirë është. Të paktën sa të marrim një gjel deti.”
“Të mjaftueshme nuk janë, por këtë herë edhe shteti nuk kishte çfarë të bënte më shumë. Me aq lekë nuk ke çfarë të bësh, të paktën u kujtuan. Si të thuash me ndonjë lëmoshë.”
“Unë do të isha më shumë i kënaqur nëse edhe ato lekë do t’i jepeshin atyre të tërmetit. Në asnjë mënyrë nuk do kisha kundërshtime nëse dhe shpërblimin do ia jepnin atyre. Madje jam duke e menduar t’i çoj vetë atje.”
“Jam dakord që të shkojnë për të prekurit e tërmetit, por nuk e zgjidhim ne këtë situatë. Kemi punuar gjithë jetën dhe shteti nuk na vlerëson si duhet. Se jemi të lodhur tani, në moshë të thyer po, ndaj dhe kënaqësia ishte të na jepnin ndonjë lekë më shumë.”/ TIRANA TODAY
