Zhvillohet seanca për masën sigurimi ndaj Ilir Bajri Rustemit, në Shkodër, i arrestuar si pjesë e grupit Bajri.
Italia ka sjellë një vendim për ekstradimin e tij në shtetin italian. Në vitin 2008-2009 gjykata e Bolonjës në Itali e ka gjykuar dhe dënuar për akuzën “trafik narkotikësh dhe shfrytëzim prostitucioni” dhe është dënuar përfundimisht me 5 vite e gjysmë burg.
Megjithatë masa e sigurisë ndaj tij u shty për një datë tjetër, pasi Bajri ishte i pranishëm, por mungonte avokati i tij mbrojtës.
Ilir Bajri Rustemi u arrestua në shtator të vitit të kaluar si pjesë e grupit të strukturuar kriminal “Bajri”, bashkë me disa persona të tjerë, ndërsa çështja ndaj tyre vijon ende tek krimet e rënda, raporton BalkanWeb.
Tashmë pritet për t’u parë nëse dënimin që ka në Itali, Ilir Bajri Rustemi pas vendimit për ekstradim dhe njohjes së këtij vendimi në Shqipëri do ta vuajë në shtetin italian apo këtu në Shqipëri.
Gjatë gjithë kohës kur u zhvillua kjo seancë e masës së sigurisë në Shkodër, gjykata e shkallës së parë ishte e rrethuar nga forca të shumta policie. Pas seancës që zgjati jo më shumë se 10 minuta, Ilir Bajri Rustemi u shoqërua nën masa të rrepta sigurie drejt paraburgimit në pritje të seancave të tjera tek krimet e rënda dhe gjykata e Shkodrës për qëllim ekstradimi.
