Rektori i Universitetit të Tiranës, Mynyr Koni i ka kërkuar ministres së Arsimit, Besa Shahinit, që të shtyjë zgjedhjet për drejtues të universiteteve.
Përmes një letre të hapur, Koni shprehet se me vendimin për të mbajtur zgjedhje në datën 12 qershor, po përjashtohen 15 mijë studentë nga procesi.
Ai kërkon që zgjedhjet të shtyhen deri kur qeveria të shfuqizojë vendimin, për gjendjen e fatkeqësisë natyrore.
“Jeni duke përjashtuar mbi 15 mijë student të Universitetit të Tiranës nga procesi zgjedhor dhe e drejta e tyre ligjore për të zgjedhur dhe për t’u zgjedhur. Sikurse ju kam kërkuar edhe në shkresën nr.1551/1 datë 4 maj 2020, po ju kërkoj publikisht edhe një herë të bëni ndryshimin e Urdhërit nr.99 datë 26.03.2020, për shtyrjen e procesit zgjedhor dhe datës së zgjedhjeve për autoritetet dhe organet drejtuese në institucionet publike të arsimit të lartë në vend, deri në shfuqizimin e Vendimit të Këshillit të Ministrave për shpalljen e fatkeqësisë natyrore në vend si dhe të urdhrave të Ministrisë së Shëndetësisë dhe Mirëqenies Sociale”, shkruhet në letër.
