Në datën 28 nëntor është planifikuar protesta e radhës e shqiptarëve që jetojnë në Londër, kundër deklaratave raciste të sekretares për Punët e Brendshme, Suella Braverman. Kjo është pohuar nga Enkelejd Omi, një nga organizatorët e protestës së të shtunës në Londër. Ai është shprehur në Euronews Albania se vitet e tjera kjo ka qenë një ditë feste, por këtë vit është menduar të jetë një tubim i ngjashëm me atë të pak ditëve më parë.
“Aktualisht do të bëjmë një peticion që do ta çojmë tek zyra e kryeministrit. Protesta e radhës do të jetë më 28 nëntor, ora gjashtë. Vitet e tjera ka qenë një ditë feste, por këtë vit kemi menduar të jetë një tubim. Përshëndes çdo politikan shqiptar që mbështet shqiptarët janë vendit, edhe pse politika është fajtorja kryesore e largimit të shqiptarëve nga vendi”, tha Omi.
Të shtunën, në Londër u mbajt një protestë e emigrantëve shqiptarë në Angli në shenjë pakënaqësie ndaj deklaratave të Sekretares së Brendshme britanike, që i konsideroi emigrantët shqiptarë si “pushtues”.
Shumë shqiptarë dolën të protestonin për të treguar se nuk duhen etiketuar të gjithë si kriminelë, pasi shumica e shqiptarëve në Britaninë e Madhe punojnë në formë të ligjshme dhe janë taksapagues të rregullt.
