Në fund të viteve 1980 në Shqipëri qarkullonte një barsoletë, sipas së cilës, përpara se të vdiste, Enver Hoxha paskësh thënë:5 vjet do të më qani, 20 vjet do të më shani, 50 vjet do të më kërkoni! Kjo lloj “profecie” anonime, duket sikur është vërtetuar. Shqiptarët e qanë për 5 vite udhëheqësin komunist, e anatemuan për mbi 2 dekada, dhe vitet e fundit kanë filluar të bëhen nostalgjikë për të.
Një sondazh i OSBE-së në fund të vitit 2016, zbuloi se 45 për qind e shqiptarëve kanë mendim pozitiv për ish-diktatorin, ndërsa vetëm 42 për qind mendim negativ. Dhe shumica e atyre që janë nostalgjikë për Hoxhën, janë mbi 52-vjeç, pra kanë kujtime më të freskëta nga ajo periudhë.
Malli për kohën e komunizmit, nuk është një dukuri vetëm shqiptare. Gjithë vendet ish-komuniste të Europës Lindore, kanë zgjedhur dhe mbështesin aktualisht udhëheqës formalisht demokratë, por që po sundojnë si autokratë. Shqiptarët po kthejnë kohën pas për shkak të thellimit në ekstrem të pabarazisë ekonomike, mungesës së theksuar të rendit dhe sigurisë për jetën.
Por edhe për shkak të mos-denoncimit si një shoqëri e tërë të krimeve të diktaturës, dhe mos-hapjes së dosjeve. Shqiptarët po qëndrojnë prej kohësh në “paradhomën” e Europës, në pritje të hapjes së dyerve, por me kokën e kthyer pas nga Enveri.
