Nehat Hyseni
Dita e enjte e 27 prillit 2017 do të mbahet mend gjatë në kujtesën e shqiptarëve të Maqedonisë për dhunën e tmerrshme të huliganëve dhe kriminelëve sllavo-maqedonas të ushtruar në Parlament.
Menjëherë pas zgjedhjes së Talat Xhaferit, si kryetari i parë shqiptar i Kuvendit të Maqedonisë, u sulmuan në mënyrë brutale deputetët e Kuvendit, duke u rrezikuar seriozisht jetën dhe duke iu shkaktuar lëndime të rënda trupore.
Më së shumti e pësuan disa deputetë të LSDM-së, me në krye liderin e saj Zoran Zaev, si dhe deputeti shqiptar, kreu i LRPDSH, Zijadin Sela, të cilët u gjakosën dhe iu rrezikua jeta.
Një pjesë e policisë lejuan kriminelët që të hyjnë brenda Parlamentit të Maqedonisë, gjë që e konfirmoi edhe ministri i Brendshëm, Agim Nuhiu, i cili theksoi se “një pjesë e efektivëve të policisë nuk e kanë kryer punën si duhet”.
Në vend që të respektojnë ligjet dhe t’i kryejnë detyrat e tyre, policët vepruan nën urdhrat e udhëheqësve politikë të VMRO-DPMNE-së së Nikolla Gruevskit dhe presidentit Ivanov, që janë nën ndikimin e drejtpërdrejtë të Rusisë së diktatorit Putin dhe të pasuesve të Sheshelit, me në krye kryeministrin e Serbisë, Aleksandër Vuçiç.
Yryshi ruso-serbo-sllavo-maqedonas
Yryshi ruso-serbo-sllavo-maqedonas ndaj Parlamentit të Maqedonisë ishte njëjtë me puçin ruso-serb kundër fitores së Gjukanoviçit në zgjedhjet parlamentare në Mal të Zi, që është i njohur për orientimin e tij proevropian e proamerikan. Pra, lufta midis pansllavizmit rus dhe influencës euroatlantike e amerikane në Ballkan është duke u zhvilluar aktualisht me intensitet të lartë dhe shumë të ashpër në Ballkan. Prania e madhe evropiane dhe amerikane në Maqedoni dhe Mal të Zi, si dhe në Kosovë, është faktor dominues dhe garanci që situata të mos përshkallëzohet.
Qëndrimi i pabesë i Lëvizjes “Besa”
Qëndrimi i Lëvizjes “Besa” karshi zgjedhjes së Talat Xhaferit, kryetar i Kuvendit të Maqedonisë, dëshmon se në tentimin për destabilizim të Maqedonisë kanë dorë edhe diktatorët nga vendet e lindjes. Kjo Lëvizje hapur doli dhe e pabesë karshi institucioneve demokratike dhe interesave të shqiptarëve të Maqedonisë! Ky ishte një “test politik”, praktik për të parë pozicionimin e gjithsecilit në politikë: se kush është për të mbrojtur e kush kundër interesave dhe ekzistencës së popullsisë së atjeshme shqiptare. Ky “testim”, pra, dëshmoi qartë se Lëvizja “Besa” u rreshtua në mënyrë eksplicite në krahun sllavo-maqedon, prorus të VMRO-DPMNE-së, dhe kundër partive politike të shqiptarëve, duke mos e votuar kandidatin shqiptar Talat Xhaferin për kryetar të Kuvendit të Maqedonisë, si dhe simpatia dhe kujdesi i huliganëve dhe kriminelëve fashistë, të cilët nuk i sulmuan ata, madje dhe i mbrojtën sikur të ishin “të shenjtë”, madje i mbrojtën edhe më mirë se deputetët pro-rus, sllavo-maqedonas të VMRO-DPMNE-së?!
Simotra e “Besës” – APN në Luginë të Preshevës
Ashtu si simotra e saj Lëvizja “Besa” në Maqedoni, është APN në Luginën e Preshevës, që u deklarua dhe u angazhua publikisht kundër Referendumit të shqiptarëve “për autonomi politike e territoriale, me të drejtë bashkimi me Kosovën”; nuk e përfilli Lapidarin e UÇPMB-së; nuk e uroi kreun shtetëror e politik të Shqipërisë për Festën e Flamurit; nuk e uroi kreun shtetëror e politik të Kosovës për Ditën e Pavarësisë; lavdëroi publikisht Serbinë para opinionit evropian “për ndihmat dhe mbështetjen ndaj shqiptarëve”, duke i kritikuar partitë politike shqiptare dhe duke i fajësuar shqiptarët e Luginës së Preshevës, si “fajtorë për gjendjen e vështirë dhe ngecjen ekonomike” dhe për gjendjen e mjerueshme në të cilën aktualisht gjenden shqiptarët në Luginën e Preshevës etj.!
Për këtë arsye, kryeministri i Serbisë, Aleksandër Vuçiç, para pak ditësh hodhi helm e vrer kundër kryeministrit të Shqipërisë, Edi Rama, kundër presidentit të Kosovës, Hashim Thaçit, kundër ish-kryeministrit Ramush Haradinaj dhe në veçanti kundër PVD-së dhe Riza Halimit dhe partive e liderëve të tjerë politik të shqiptarëve në Luginën e Preshevës.
Por, Vuçiç e lavdëroi dhe “e ngriti në qiell” Shqipërim Arifin dhe partinë e tij APN, duke i lavdëruar e duke i quajtur si “shqiptarë të mirë”!
Mjerisht, është e qartë se në Maqedoni, Lëvizja “Besa” e Kasam Bilallit dhe, në Luginën e Preshevës APN e Shqipërim Arifit, janë radhitur në shërbim të devotshëm dhe argatllëk të pansllavizmit ruso-serbo sllavo-maqedonase dhe kundër interesave dhe pranisë euroatlantike dhe kundër interesave gjeostrategjike e gjeopolitike të shqiptarëve në Ballkan.
