Shqiptarët prej vitesh vijojnë të largohen nga vendi me qëllim përfitimin e azilit në vendet e Bashkimit Evropian. Fluksi më i madh i largimit të shqiptarëve ka qenë gjatë vitit 2015, ndërsa ka fshatra në zona malore të Shqipërisë të cilët kanë mbetur pothuajse të shkretë për shkak të dyndjeve drejt vendeve evropiane për një jetë më të mirë. Fenomeni i azilit nuk është vetëm në Shqipëri, por ai ka shtrirje të gjerë në vendet e tjera, ndërkohë për të huajt edhe Shqipëria shikohet si një strehë për përfitimin e azilit.
Shifrat apo numrat në vetvete nuk përcjellin këtë ide, por e shprehur në përqindje për personat që kërkojnë azil në Shqipëri është rritur me 126 për qind, por kjo shifër tregon se edhe Shqipëria në perceptimin e të huajve shikohet si një hapësirë shpëtimi për emigrantët nga Lindja e Mesme.
Instituti i Statistikave ka publikuar të dhëna të cilat tregojnë se si është rritur numri i personave që kërkojnë azil, ndërsa theksohet se emigrantët nga Afganistani dhe Iraku dhe Siria janë gjithnjë në rritje.
“Azilkërkuesit në Shqipëri, referuar Drejtorisë së Azilit pranë Ministrisë së Punëve të Brendshme, rezultojnë 240 persona në 2016, shifër kjo e cila ka shënuar rritje me 126%, krahasuar me 2015. Duke analizuar vendin e origjinës së azilkërkuesve, në Shqipëri kuptojmë se shumicën e rasteve e përbëjnë ato me origjinë nga Siria, rreth 130 azilkërkues dhe ato me origjinë nga Afganistani, rreth 60 azilkërkues për 2016. Në 2016, vihet re një rritje e numrit të azilkërkuesve nga Afganistani dhe Iraku” thuhet në raportin e INSTAT.
Shumë shqiptarë pavarësisht kërkesave për azil në vendet e BE, atyre u është mohuar përfitimi i ayilit me pretendimin se vendi i origjinës është një vend i sigurt dhe nuk i ngjan realitetit me emigrantët që vijnë nga vatrat e konflikteve në Lindje të Mesme. Vetëm dy ditë më parë janë riatdhesuar 130 emigrantë nga Franca pa marrë parasysh kthimin e vazhdueshëm gjatë vitit 2018.
Pavarësisht se Shqipëria kërkon hapjen e negociatave me BE, përfaqësuesit e vendeve evropiane kanë bërë apele të vazhdueshme që të ndalojë ky fenomen pasi mund të ketë pasoja për Integrimin e vendit, madje për shkak të kësaj sjellje është kërcënuar dhe me kthimin e vizave “Shengen”.
Numri i të huajve me leje qëndrimi në Shqipëri, në 2016, rezultoi 12.519, duke shënuar një rritje me 18,5 %, krahasuar me 2015. Gjatë 2016, numri i të huajve rezident përbëhet nga 8.324 meshkuj dhe 4.195 femra. Grupmosha 30 – 59 vjeç zë 62,4 % të të huajve gjithsej në 2016, duke shënuar një rritje me 25,8 %, krahasuar me të njëjtën grupmoshë në 2015. Në vitin 2016, të huajt me origjinë nga Europa janë 8.324 dhe përbëjnë 66,5 % të të huajve gjithsej. Të huajt për arsye punësimi, në vitin 2016, janë 6.263, dhe përbëjnë 50 % të të huajve gjithsej në vend.
Të huajt e parregullt, të evidentuar në 2016, rezultojnë 915 persona, duke pësuar një rënie me 55,3 %, krahasuar me vitin 2015. Azilkërkuesit në Shqipëri, në 2016, rezultojnë 240 persona, duke shënuar një rritje me 126 %, krahasuar me vitin 2015. Të huajt në Shqipëri Numri i të huajve me leje qëndrimi në Shqipëri, në vitin 2016, përbën rreth 0,4 % të popullsisë rezidente. Gjatë 2016, numri i të huajve rezident përbëhet nga 8.324 meshkuj dhe 4.195 femra. Meshkujt zënë rreth 66 % në numrin e të huajve me leje qëndrimi në Shqipëri.
Të huajt në Shqipëri sipas kontinenteve Të huajt sipas vendit të origjinës në 2016, kryesohen nga vendet e Europës, të cilët zënë 66,5 % të të huajve gjithsej. Të huajt me origjinë nga Europa janë 8.324, duke shënuar një rritje me 10,1 %, krahasuar me 2015. Të huajt me origjinë nga Azia janë 3.244, duke shënuar një rritje me 89,6 %, krahasuar me 2015.
Të huajt me origjinë nga Afrika, Amerika dhe Oqeania janë 951, duke pësuar një rënie me 26,2 %, krahasuar me 2015. Të huajt në Shqipëri sipas arsyes Në vitin 2016, sipas arsyes, të huajt që aplikojnë për leje qëndrimi për punësim zënë 50,0 % të të huajve gjithsej, ndjekur nga aplikimet për bashkim familjar me 22,2 %, aplikimet për qëllime humanitare me 19,1 %, aplikimet për studime me 5,2 % dhe aplikime për arsye të tjera me 3,4 %.
Azilkërkuesit sipas gjinisë
Numri i azilkërkuesve meshkuj në 2016 është 186, duke shënuar një rritje me 126,8 %, krahasuar me vitin 2015. Numri i azilkërkuesve femra në 2016 është 54, duke shënuar një rritje me 125,0 %, krahasuar me vitin 2015. Vihet re një dominim i meshkujve në numrin e azilkërkuesve në Shqipëri gjatë viteve 2014 – 2016, ku meshkujt zënë 77,5 % të numrit gjithsej të azilkërkuesve në 2016.
Marrja dhe lënia e shtetësisë Shqiptare
Në 2016, rezultojnë 281 persona të cilët kanë fituar shtetësi shqiptare, duke pësuar rritje me 9,3 %, krahasuar me vitin 2015. TIRANA TODAY
