Kryeministri Edi Rama në një lidhje direkte me emisionin “Opinion” foli për shqiptarët të cilët nuk arritën të riatdhesohen.
Kreu i Qeverisë tha se sapo u lançua misioni i riatdhesimit pati një dyndje të madhe.
Rama theksoi se nuk mund të kthehen të gjithë shqiptarët, teksa pohoi se qeveria ka arritur që të riatdhesojë vetëm 2000 shqiptarë.
Kryeministri tha se aktualisht vendi nuk mund të përballojë hapjen e kufijve.
“Motra dhe vëllezër mos tentoni të vini sepse kufijtë janë mbyllur. Ne nuk mund të përballojmë hapjen e kufijve. Ruajeni veten tuaj”, tha Rama.
Ndërkohë teksa foli për Aktin Normativ që synon të rregullojë raportet qiramarrës-qiradhënës, kryeministri Rama theksoi edhe një herë se janë të panegociueshme pagesat e taksave apo shlyerja e faturave të energjisë dhe ujit:
“Heqje taksash, shtyrje taksash, shtyrje faturash, të mos e përdorin në këtë luftë. Lufta financohet me taksa, nuk financohet nga ndonjë shpellë që ka flori, por financohet nga taksat. Kemi falur 150 milion dollarë kamatvonesa. Taksa, fatura detyrimesh për drita, janë jashtë bisedës”.
