Presidenti Ilir Meta ka reaguar në lidhje me situatën e krijuar në pikën kufitare të Kakavijës dhe Kapshticës, ku një grup shqiptarësh vijon të jetë i bllokuar.
Përmes një postimi në Facebook, Meta tha se duhet ndërmarrë një zgjidhje e menjëhershme në lidhje me këtë situatë.
Kreu i shtetit kërkon nga autoritetet që të respektojnë detyrimet kushtetuese dhe ndërkombëtare, që shteti ka ndaj qytetarëve të vet në një situatë të tillë.
Ndërkohë, Meta i ka bërë edhe një herë thirrje qytetarëve që të zbatojnë kushtet e urgjencës.
Postimi i plotë:
Jam shumë i shqetësuar mbi situatën e qytetarëve shqiptarë të cilët vijojnë ende të bllokuar në pikat e kalimit kufitar të Kakavijës dhe Kapshticës.
Kjo situatë duhet të marrë zgjidhje të menjëhershme.
U bëj thirrje sërish të gjithë qytetarëve shqiptarë të respektojnë kushtet e urgjencës dhe domosdoshmërisë të imponuara nga pandemia e COVID-19 në pikat tona kufitare e njëkohësisht kërkoj nga autoritetet tona përgjegjëse të respektojnë, jo vetëm kërkesat e situatës së gjendjes së fatkeqësisë natyrore, por edhe detyrimet kushtetuese dhe ndërkombëtare që shteti ka ndaj qytetarëve të vet në një situatë të tillë.
Edhe njëherë kërkoj nga të gjithë më shumë bashkëpunim e mirëkuptim, solidaritet e përgjegjësi mes qytetarëve dhe autoriteteve tona në dobi të interesit publik dhe sigurisë së jetës.
