Kryeminstri Rama nuk ka të ndalur me mesazhet sensibilizuese ndaj qytetarëve, që të jenë të ndërgjegjshëm për zbatimin e masave ndaj koronavirusit vdekjeprurës. Sot janë regjistruar 8 raste të reja, të cilat kanë rezultuar pozitive me koronavirus në Shqipëri.
Ministria e Shëndetësisë njoftoi se numri i të prekurve në vendin tonë ka arritur tashmë në 23. Rama njofton me anë të një postimi në Facebook për rregullat e reja. Ai nënvizon se marrja në automjetin e punës së personave të familjes apo personave të tjerë që s’kanë lidhje me detyrën shtetërore, është rreptësisht e ndaluar dhe do të ndëshkohet me sanksione të rënda.
Statusi
? NESËR ADMINISTRATA SHTETËRORE DO TË JETË PUSHIM
? PËR KRYERJEN E DETYRËS NË SHËRBIMET SHTETËRORE OSE PUBLIKE BRENDA PERIMETRIT TR-DR, GJATË PERIUDHËS SË “SHTET-RRETHIMIT” TË FUNDJAVËS, PUNONJËSIT E AERPORTIT APO TË INSTITUCIONEVE TË TJERA SHTETËRORE QË KRYEJNË FUNKSIONE TË DOMOSDOSHME DHE E KANË TË PAMUNDUR LËVIZJEN NË KËMBË, DUHET TË AKREDITOHEN PRANË DREJTORISË SË PËRGJITHSHME TË POLICISË SË SHTETIT, EMËR PËR EMËR
? MARRJA NË AUTOMJETIN E PUNËS E PERSONAVE TË FAMILJES APO PERSONAVE TË TJERË QË S’KANË LIDHJE ME DETYRËN SHTETËRORE ËSHTË RREPTËSISHT E NDALUAR DHE DO TË NDËSHKOHET ME SANKSIONE TË RËNDA
? PËR VAJTJE – ARDHJET NGA AEROPORTI DREJTUESI I AUTOMJETIT DUHET T’I TREGOJË POST-BLLOKUT, BILETAT E FLUTURIMIT TË PERSONAVE QË DO TË LARGOHEN APO FOTON E BILETAVE TË PERSONAVE QË DO TË MBËRRIJNË
? FRIKË ASPAK, KUJDES PO! SHUMË FARE!
Shqipëria ka hyrë në ditën e katërt të panikut nga koronavirusi. Qeveria dhe autoritetet e tjera kanë marrë masa drastike për të parandaluar përhapjen e koronavirusit, ku Bashkia e Tiranës me një urdhër ka pezulluar transportin urban.
Kryeministri Rama ka njoftuar sot se nga ora 06:00 e mëngjesit të së premtes do të ndalohet edhe lëvizja me makina private.
Të vetmet mjete që do të lejohen të qarkullojnë janë ato shtetërore, autoambulancat dhe mjetet që transportojnë mallra, ku përfshihen edhe bizneset.
