Elseid Hysaj do humbasë finalen me Bjellorusinë, pasi mbrojtësi i djathtë ka rezultuar pozitiv me koronavirus. Këtë e ka konfirmuar FSHF në faqen zyrtare, por edhe vetë lojtari apo edhe skuadra napolitane. Sakaq, trajneri Reja pritet që të ketë në fushë “gladiatorin” Gjasula, i cili do të sakrifikojë duke ditur se problemet në shpatull, nuk kalojnë kaq thjeshtë brenda dy ditësh. Shqipëria konsiderohet favorite për këtë takim nga kompanitë ndërkombëtare të basteve.
Të besuarit e Rejës do të kërkojnë me çdo kusht fitoren ditën e sotme, për ta mbyllur Ligën e Kombeve në vendin e parë, që ka qenë edhe objektivi që në fillim.
Kuqezinjtë kuotohen për fitoren 1.75, ndërsa Bjellorusia 4.7. Barazimi për këtë ndeshje vlerësohet me koeficientin 3.6. Fitorja në transfertën bjelloruse e dikton këtë.
Reja në konferencën për shtyp para ndeshjes me Bjellorusinë, përcaktuese për vendin e parë në grup, tha se nuk do të bëjë ndryshime të mëdha në formacion krahasuar me skuadrën që hodhi në fushë ndaj Kazakistanit.
