Ish-deputeti demokrat, Tritan Shehu ka akuzuar në mënyrë të drejtpërdrejt kryeministrin Rama duke thënë se ai po përdor Kosovën për të kërcënuar Evropën.
Në deklaratën e tij, Tritan Shehu shprehet se Rama po i bën një dëm të madh Kosovës dhe këtë sipas tij, e bën vetëm e vetëm për të mbrojtur pushtetin e tij.
“Edi Rama po i bën një dëm të madh Kosovës, dialogut të saj me Serbinë dhe njohjeve ndërkombëtare me kërcënimet për Bashkimin me Shqipërinë, ose siç e quajnë jo miqtë tanë për “Shqipërim e Madhe”. Pasi përdori krimin për pushtet tani Edi Rama po përdor Kosovën për të kërcënuar Evropën vetëm e vetëm për të mbrojtur pushtetin e tij”, u shpreh ish-deputeti demokrat.
Qëndrimet e kryeministrit Rama, për bashkimin e Shqipërisë me Kosovën sipas Shehut, janë në dëm të të dyja palëve.
Sipas ish-deputetit demokrat, Rama po e përdor çështjen e Kosovës vetëm për interesa personale, gjë të cilën ai e quan kriminale.
“Teza e loja “nacionaliste” e gjoja bashkimit të Shqipërisë me Kosovën është në dëm të perspektivës evropiane të Shqipërisë, Kosovës, të Rajonit e të stabilitetit të tij. Kjo demagogji shkon ndesh me interesat tona kombëtare të bashkimit real të të gjithë shqiptarëve nesër, si vende pa kufij në BE”, përfundon Tritan Shehu.
Deklarata e plotë:
Edi Rama po i bën një dëm të madh Kosovës, dialogut të saj me Serbinë dhe njohjeve ndërkombëtare me kërcënimet për Bashkimin me Shqipërinë, ose sic e quajnë jo miqt tanë për “Shqipërim e Madhe”. Pasi përdori krimin për pushtet tani Edi Rama po përdor Kosovën për të kërcënuar Evropën vetëm e vetëm për të mbrojtur pushtetin e tij. Nëse do të donte vërtet Kosovën Edi Rama nuk do të mbështeste ndarjen e saj, nuk do t’u vendoste traun kosovareve e shqiptareve, Shqipëria nuk do te ishte vendi i dytë pas Serbisë me tarifat më të larta për Kosovën, dhe nuk do bëhej një shkak më shume për pengimin e liberalizimit të vizave ndaj Prishtinës. Përdorimi i Kosovës për interesa personale është kriminale. Teza e loja “nacionaliste” e gjoja bashkimit të Shqipërisë me Kosovën është në dëm të perspektivës europiane të Shqipërisë, Kosovës, të Rajonit e të stabilitetit të tij.
Kjo demagogji shkon ndesh me interesat tona kombëtare të bashkimit real të të gjithë shqiptarëve nesër, si vende pa kufij në BE.
