Shqipëria ka kontribuar me 1 milionë euro për Ukrainën. Kjo është konfirmuar nga kryeministri Rama, i cili ishte i pranishëm në Konferencën e Donatorëve, teksa shtoi se uron që t’i jepet sa më shpejt fund luftës.
Kryeministri Edi Rama ndodhet sot në Varshavë, Poloni, në Konferencën e Donatorëve për Ukrainën, e bashkëorganizuar nga Kryeministri i Polonisë Mateusz Morawiecki dhe Kryeministrja e Suedisë, Magdalena Andersson, në partneritet me Presidentin e Këshillit Evropian, Charles Michel dhe Presidenten e Komisionit Europian, Ursula von der Leyen.
“Në këtë konferencë ne do të kontribuojmë me 1 mln euro. E di që nuk do të ndryshojë në përfundimin e luftës, pra mënyrën si po zhvillohet lufta, por ne jemi të nderuar që jemi këtu. Jam falenderues për Kryeministrin polak që është pjesë e kësaj konference, për të bërë më të mirën për ukrainasit dhe të shohim sa më shpejt paqen”, tha Rama.
Konferenca, me pjesëmarrje të nivelit të lartë të kryetarëve të shteteve dhe qeverive, i dedikohet qëllimit të përbashkët për të mbështetur reagimin humanitar të OKB-së në Ukrainë dhe për të diskutuar hapat e mëtejshëm drejt mbështetjes së përpjekjeve të Ukrainës për të trajtuar sfidat ekonomike të krijuara nga lufta.
