Operatori i Shpërndarjes së Energjisë Elektrike dhe Koorporata Eletroenergjetike Shqiptare kanë hapur tenderët dhe të hënën pritet të mbyllet procedura për blerjen e energjisë nga importi për muajin shtator.
Ftesa nga OSHEE është për të blerë 274 mijë e 200 megavat orë, kurse KESH kërkon 134 mijë megavat orë. Aktualisht të dy kompanitë janë duke bashkëpunuar me njëra-tjetrën, pasi në rast se Koorporata Elektroenergjetike nuk arrin dot ta mbyllë procedurën, atëherë do të duhet që sasinë e energjisë ta sigurojë vet OSHEE-ja. Në total, importet e shtatorit mund të shkojnë mbi 20 milionë euro.
KESH-it iu krijua një mundësi për të përdorur një fond të Bankës Botërore prej gati 23 milionë eurosh për të blerë energji nga importi. Përdorimi i këtij financimi lidhej me krijimin e situatave të rënda klimatike, në rast të rënies së prurjeve në Kaskadën e Drinit.
Shqipëria ka importuar mbi 50 milionë euro energji elektrike gjatë muajve korrik dhe gusht, për të përballuar rënien e prodhimit vendas si pasojë e thatësirës. Fatura është përballuar nga OSHEE, ndërkohë që për muajt në vazhdim do të ketë edhe një bashkëpunim të KESH.
