Kryeministri Edi Rama tha se nga 1 janari 2018 Shqipëria dhe Kosova do të jenë pa dogana. Kjo do të thotë se pika doganore tokësore do të funksionojë si doganat tokësore brenda BE-së. Deklarate e kryeministrit Rama është hedhur poshtë nga delegacioni i Bashkimit Evropian në Shqipëri i cili ka hedhur poshtë deklaratat e zyrtarëve të lartë shtetërorë e politikanëve si në Shqipëri e Kosovë , ku sipas tyre që nga 1 janari i vitit që vjen Shqipëria pret Kosovën që të hapë kufirin, shkruan sot Koha Ditore.
Por Bashkimi Evropian si financues i ndërtimit të pikës së kalimit kufitar të përbashkët Morin-Vërmicë ka bërë të ditur se pika e përbashkët e kalimit kufitar do të funksionojë sipas nenit 7/3 të SBC-së (Kodi i Kufijve i Shengenit). Kryeministri Rama, ka hedhur i pari idenë në drejtim të qeverisë së Kosovës për një kufi pa dogana mes njëri-tjetrit.
“Uroj që të biem dakord për kthimin e kufirit tokësor mes dy shteteve në një kufi evropian; pa radha kilometrike dhe kontrolle të tepërta policore, mundësisht qysh prej 1 janarit 2018. Gjithashtu, uroj që bashkimin doganor të Shqipërisë me Kosovën ta bëjmë fakt të kryer një orë e më parë, duke i kthyer doganat në portet e Shqipërisë në dogana edhe të Kosovës. Ne jemi gati. Shpresoj që edhe Kosova të jetë gati”, tha kryeministri Edi Rama, gjatë një fjalimi të mbajtur më 11 shtator në Parlamentin e ri.
