Tre ish-zyrtarëve të lartë të policisë u larguan nga Shqipëria para lëshimit të urdhër arresteve nga Prokuroria e Krimeve të Rënda. Ish-drejtorët e policisë janë shpallur në kërkim si të dyshuar të implikuar në trafik droge me bandën e Habilajve. Ndërkohë “Panorama” shkruan se Prokuroria e Krimeve të Rënda ka nisur një hetim pasuror për tre ish-drejtorët e policisë.
Hetimi pasuror do të zhvillohet ndaj ish-drejtorin e Policisë Vlorë Jaeld Çela, ish-shefin e krimit të organizuar në Vlorë Gjergj Kohila dhe ish-shefin e kufirit në Dhërmi Sokol Bode.
Në 22 Nëntor për këta të tre doli një urdhër ndalimi nga Prokuroria e Krimeve të Rënda, e cila dyshon për implikim të tyre në trafikun e kanabisit. Dy ditë më parë gjykata e Krimeve të Rënda pranoi kërkesën e Prokurorisë për të lëshuar urdhër-arresti për ish-zyrtarët e lartë të policisë Jaeld Çela dhe Gjergj Kohila.
Mbi ta rëndon akuza e kultivimit dhe trafikut të lëndëve narkotike në kuadër të grupit të strukturuar kriminal. Sipas hetimeve ata kanë bashkëpunuar me grupin e “Habilajve” të cilët gjatë katër viteve të fundit kanë trafikuar drejt Italisë 3,5 ton kanabis.
