Analisti Shpëtim Nazarko ka deklaruar në emisionin “Now” në Euronews Albania, se Berisha ka vendosur në krye të Ministrisë së Ekonomisë kur ishte në qeveri, Genc Rulin, i cili aludohet se ka qenë bashkëpunëtor i Sigurimit të Shtetit.
Nazarko ka fajësuar klasën politike dhe kryetarët e tre partive kryesore në vend, në lidhje me hapjen e dosjeve.
Sipas tij, është diçka kriminale të vendosësh në poste publike, përfshirë edhe atë të presidentit, njerëz që kanë qenë bashkëpunëtorë të Sigurimit.
“Kanë vënë në krye të shtetit një Ministër të Ekonomisë, sot po aludohet për Genc Rulin. Çfarë ka bërë Sali Berisha? Ka vënë një Ministër të Ekonomisë, që është i shantazhueshëm nga ai tjetri që nuk ka interesat që kam unë për Shqipërinë. Ky nuk është ligj për mua, por mua më intereson kjo gjë. Kush i lejon këta që kanë drejtuar Shqipërinë që të veprojnë më keq se Enver Hoxha?
Këto nuk kanë kuptuar sistemin e Enver Hoxhës. Në një sistem të hapur, e di çfarë do të thotë të kesh një njeri me njolla të këtij lloji, që mund të jetë Ministër Financash, kryeministër, president. Për këtë arsye duhet të zhdukesh nga politika”, theksoi ai.
Kuvendi i Shqipërisë miratoi me 94 vota pro dhe 1 abstenim ligjin për Dosjet e Sigurimit të Shtetit, ku u shfuqizuan vendimet ekskluzive të komisioneve “Bezhani” e “Mezini”, duke i dhënë të drejtë Autoritetit të Dosjeve të rivlerësojë figurën e zyrtarëve të pajisur me certifikatë pastërtie.
Kujtojmë se Projektligji erdhi pas kërkesës së autoritetit pasi doli një dosje me një spiun të Sigurimit me iniciale I.M që dyshohet se është ish-presidenti Ilir Meta. Gjithashtu u miratuan edhe amendamentet e propozuara bashkërisht nga PD dhe PS që çdo kush mund të kërkojë dosjen e tij, por duhet ta argumentoj pse e kërkon dhe nëse të dhënat do të dalin në publik e të keqpërdoren, do të mbajë përgjegjësi.
