Deputetja Rudina Hajdari, gjatë fjalës së saj në Kuvend, ka deklaruar se politika ka dështuar në hapjen e dyerve të negociatave për në BE, dhe se në këto ditë vendimtare për këtë proces, shqiptarëve u duhet thënë e vërteta.
Ajo deklaroi se shqiptarëve nuk duhet t’u shesin fabula të dështuara, dhe se Shqipëria ka nevojë për frymë të re politike. Po kështu, deputetja është ndalur edhe tek ekonomia, ku tha se 2018 ishte një vit i rrënimit ekonomik në Shqipëri. Rudina Hajdari paralajmëroi se jemi në prag të kolapsit ekonomik.
“2018 ishte një vit i rrënimit ekonomik në Shqipëri, që shënoi zero investime të huaja. Ne jemi në një prag të kolapsit ekonomik. Raportet ndërkombëtare tregojnë qartë, sidomos i DASH në 2018, tregoi se krimi i organizuar ka kapur sektorin ekonomik si në ndërtim, turizëm.
Kjo tregon që jemi kthyer një ekonomi e qartë kriminale. Tirana është kthyer ne qendrën e pastrimit të parave, dhe po shpërthen me ndërtime të reja. Paaftësia për të ndëshkuar krimin, ka shtyrë që situata të dalë jashtë kontrollit. Edi Rama është kampion mbi shmangien e përgjegjësisë ku është vendi. Ai e mbulon situatën me disa fabula të Rilindjes.
Viti 2018 u mbyll me protestë madhore nga studentët, që tregoi se një familje nuk është në gjendje të paguajë tarifat e studentëve. Dhe është pikërisht kjo shtresë e shoqërisë sonë që kërkon të largohet nga Shqipëria.
Ne kemi dështuar t’i japim shqiptarëve një shpresë për të rinjtë, dhe një vizion të qartë që tregon që ne duhet të hapim dyert e Evropës. Duhet të mos i shesim shqiptarëve fabula të dështuara. 2019-a është viti testues dhe do ndiqet nga disa raporte të tjera.
Shqipëria ka nevojë për ndryshim, për frymë të re politike, që ne t’i themi realitetin. Inkurajoj që ditët në vijim, të jemi të qartë me shqiptarët se çfarë do të ndodhë me negociatat”, u shpreh Rudina Hajdari.
