Kreu i Shtetit, Ilir Meta, është shprehur mjaft i vendosur se do të japë dorëheqjen nëse Komisioni i Venecias në raportin e 11 tetorit do të shprehet se ai ka shkelur Kushtetutën, me anulimin e zgjedhjeve të 30 qershorit. Meta ka qenë i prerë se do të largohet në rast se opinioni i Venecias do të jetë i ndryshëm nga qëndrimi i tij.
“Patjetër! Këtë merak ke ti? Patjetër, nëse Venecia thotë që unë kam shkelur Kushtetutën, unë do të jap dorëheqjen. Unë kam dhënë dorëheqje edhe si kryeministër për më pak se kaq.
Të thotë Venecia që unë kam shkelur Kushtetutën, dhe unë të rri President? Kurrën e kurrës! Sa herë ka thënë Gjykata Kushtetuese që ka pasur ligje të Parlamentit apo vendime qeverie në shkelje kushtetuese, dhe s’ka ndodhur asgjë”, u shpreh Meta në një intervistë për Syri Tv.
