Një tragjedi natyrore ka ndodhur në një nga ishujt e Zelandës së Re. Si pasojë e shpërthimit të një vullkani kanë mbetur të plagosur dhjetëra persona dhe një viktimë deri tani raportojnë autoritetet. Gjithashtu, shumë turistë në afërsi të vullkanit rezultojnë të humbur. Autoritetet bëjnë me dije se numri i viktimave pritet të rritet.
Sipas policisë vendase ka shpërthyer një nga vullkanet më aktiv të vendit, ai i Ishullit të Bardhë i njohur si “Whakaari”.
Vetëm disa momente para shpërthimit të vullkanit në Ishullin e Bardhë, disa turistë u panë duke ecur përreth kraterit të vullkanit.
Deri tani janë shpëtuar 23 njerëz dhe ende shumë rezultojnë të zhdukur. Retë e tymit dhe pluhuri ka rezultuar në ndërprerje të operacioneve të kërkimit për shkak të rrezikshmërisë.
Kryeministrja e Zelandës së Re, Jacinda Ardern, tha se disa turistë ndodhen përreth ishullit dhe në të. Në mesin e tyre ka banorë të Zelandës, por edhe turistë të huaj.
Vullkani shpërtheu në orën 2 e 11 minuta të pasdites sipas kohës lokale, që në kohën evropiane i bie në orën 1 e 11 pas mesnatës, shkruan “BBC”.
