Turqia po vuan si pasojë e shtimit të rasteve me koronavirus. Numri i të infektuarve me COVID-19 në Turqi është rritur në 281.509, me 1.703 raste më shumë gjatë 24 orëve të fundit. 57 pacientë të tjerë humbën jetën, duke e çuar numrin e të vdekurve në 6.730, ndërsa numri i të shëruarve arriti në 252.152. Në lidhje me këtë situatë, presidenti turk Recep Tayyip Erdoğan tha se do të merren masa të reja.
“Në të gjitha provincat, nuk do të lejohet asnjë udhëtar në këmbë në transportin publik”, tha presidenti turk. Ai shtoi se edhe kafenetë dhe restorantet gjithashtu do t’u nënshtrohen inspektimeve më të rrepta.
Në lidhje me vitin e ri shkollor, Erdoğan tha se nxënësit do të frekuentojnë shkollën, por nuk përjashtohet mundësia që mësimi të jetë edhe nga shtëpia. “Ne do të vazhdojmë arsimin me një sistem ku do të bëjmë edukim edhe ballë për ballë, edhe nga largësia, duke marrë parasysh kushtet e epidemisë”.
