Gjykata Kushtetuese ka publikuar sot vendimin e argumentuar, në lidhje me shfuqizimin e nenit që i shpërndan mandatet e deputetëve sipas herësit. Ndryshe nga sa u interpretua Kushtetuesja nuk e ka shfuqizuar herësin, por ka konsideruar si antikushtetues masën e tij.
Sipas Kushtetueses, në përcaktimin e herësit nuk duhet të vendosen kufizime në një masë më të madhe se sa është e nevojshme për të arritur objektivat, në respektim të së drejtës për të zgjedhur dhe parimit të barazisë së votës.
Gjykata vlerëson se parashikimi i herësit, lidhur me vlerën e tij numerike, i përcaktuar në pikën 3 të nenit 163 të Kodit Zgjedhor, si një ndër kriteret që ndikon në shpërndarjen e mandateve, cenon të drejtën për të zgjedhur, pasi nuk përmbush kriterin e proporcionalitetit.
“Për rrjedhojë, Gjykata vlerëson se parashikimi i herësit, lidhur me vlerën e tij numerike, i përcaktuar në pikën 3 të nenit 163 të Kodit Zgjedhor, si një ndër kriteret që ndikon në shpërndarjen e mandateve, cenon të drejtën për të zgjedhur, pasi nuk përmbush kriterin e proporcionalitetit”, thuhet në vendimin e Gjykatës Kushtetuese.
Bindja Demokratike e Astrit Patozit dhe Lëvizja Demokratike e Myslim Murrizit e kishin dorëzuar kërkesën në 29 dhjetorin e kaluar, ndërkohë që shqyrtimi i Gjykatës kishte filluar më 9 qershor, me një vendim që u mor me 6 vota pro dhe një kundër, ai i gjyqtarit Altin Binaj.
Pengesa e herësit u vendos nga Partia Socialiste së bashku me disa deputetë të opozitës parlamentare,që bashkuan votat për të ndryshuar fillimisht kushtetutën e më pas Kodin Zgjedhor, nën argumentin e hapjes së listave të kandidatëve për deputetë.
