Kryeministri Edi Rama ka folur në lidhje me transparencën në përdorimin e fondeve të siguruara nga Konferenca e Donatorëve.
I ftuar në emisionin “Real Story” në News24, Rama tha se në procesin e dhënies së parave do marrin pjesë vetë donatorët.
Kreu i qeverisë deklaroi se opozita nuk do të marrë pjesë, pasi sipas tij oponencën më të mirë mund ta bëjnë ata që kanë dhënë paratë.
“Kemi angazhuar një mekanizëm për transparencën dhe mbi të gjitha për ecurinë. Komiteti ynë i ngritur do të ketë pjesëmarrje edhe të donatorëve. Oponencë më të mirë do të kemi vetë ata që kanë dhënë paratë. Nuk është e vërtetë që unë nuk do të shkoja dot të pi kafe në zona të prekura nga tërmeti, nëse nuk do të kishim marrë para. Ne kemi bërë punë me laps dhe jo me vesh. Unë u ndjeva shumë krenar, me prezantimin e ministrit të Rindërtimit. Ne e kemi nisur nga zero dhe kemi shkuar tek 1.15 miliardë. As në planin optimist nuk e kemi menduar se do të mblidhen kaq para. Skenari ishte që do merrnim 400 milionë euro grante dhe kredi. Skenari ynë optimist ishte 600. Kjo shifër është përtej suksesit”, tha ai.
