Autori i masakrës së djeshme në Selenicë të Vlorës Ridvan Zykaj është vënë më në fund në pranga. Pas orëve të shumta të kërkimit të tij përgjatë natës Renea, Fnsh dhe Delta Forcë, bënë të mundur kapjen e autorit të krimit, në një zonë periferike në dalje të Selenicës.
Zykaj, i veshur me pantallona të shkurtra dhe me fytyrën gjithë baltë nuk ka mundur t’i fshihet më tej policisë sapo ka zbardhur dita.
Autorit të masakrës iu gjet arma e krimit, një kallashnikov. Ndërsa policia shoqëroi Zykajn në DVP Vlorë, për veprimet e mëtejshme.
Zykaj vrau dje 8 persona të një fisi duke shuar gati dy familje në rrethana dhe motive që nuk janë shpjeguar ende nga ana e policisë. Ndërsa i vetmi motiv mbetet ai për shkak të problemeve mendore të 24-vjeçarit Zykaj dhe të çështjeve të pronësisë.
Njoftimi i policisë: Si rezultat i punës së mirëorganizuar, krehjes së territorit, kontrolleve të shumta dhe pa ndërprerje gjatë gjithë natës edhe me anë të qenit gjurmues, të përdorur nga ana e strukturave Policore të DVP Vlorë, Renea, Fnsh dhe Delta Forcë, u bë e mundur kapja e autorit të krimit Ridvan Zykaj në një zonë periferike në dalje të Selenicës.
Gjithashtu u sekuestrua edhe arma e krimit, një kallashnikov. Autori është shoqëruar në DVP Vlorë, për veprimet e mëtejshme.
Materialet hetimore do t’i referohen Prokurorisë së Rrethit Gjyqësor Vlorë për veprën penale ”Vrasje në rrethana cilësuese, ndaj dy ose më shumë personave”, parishikuar nga neni 79/dh i Kodit Penal.
