Duke marrë parasysh që sezoni turistik është në kulmin e tij, duke sjellë trafik të rënduar në rrugët lidhëse me zonat bregdetare, Policia Rrugore ka ndërmarrë masa të rënda ndëshkimi për të gjithë ata drejtues mjetesh, që nuk respektojnë sinjalistikën.
Policia ka vendosur që të ketë efektivë civilë në akset lidhëse me zonat bregdetare, të cilët do të fotografojnë shkeljet dhe do të vendosin gjobat në mungesë, sipas përcaktimeve të Kodit Rrugor.
“Sezoni turistik karakterizohet nga një trafik i rënduar, kryesisht në rrugët lidhëse me zonat bregdetare dhe, për rrjedhojë, edhe shkeljet e rregullave të qarkullimit rrugor nga drejtues mjetesh që nxitojnë dhe sfidojnë rregullin, pa menduar pasojat e rrezikshme për vete dhe të tjerët, janë më të shumta“, deklaron Policia.
Gjithashtu ata paralajmërojnë se rrugorët e kryeqytetit do të monitorojnë dhe patrullojnë rrugët dhe segmentet problematike me agjentë civilë dhe jo vetëm. “Manifesto durim në drejtim”, u drejtohet Policia shoferëve.
