Atentati i mbrëmshëm ndaj Hekuran Billës në zonën e Komunës së Parisit nuk është regjistruar nga kamerat e sigurisë.
Dyshohet se autorët e kanë zgjedhur qëllimisht zonën që të mos regjistroheshin nga kamerat e sigurisë.
Autorët e kanë ndjekur 40-vjeçarin me automjet dhe janë pozicionuar paralel me makinën e tij, pikërisht në 100 metrat e zonës pa kamera. Ata kanë qëlluar me breshëri ndaj tij me 11 plumba.
Sipas News24, arma e përdorur në krim ishte një MP5 me silenciator, e paregjistruar në Shqipëri e cila është dërguar për ekspertizë në laborator.
Mjeti tip ‘Benz’ i përdorur nga atentatorët rezulton të jetë vjedhur në qytetin e Kukësit. Mjeti është fiksuar nga kamerat në dalje të rrugicës ku u krye vrasja e më pas në Unazën e Re. Autorët më pas janë larguar drejt Pezës së Vogël, ku edhe i kanë vënë flakën makinës.
Edhe targat rezultojnë t’i jenë vjedhur një automjeti në Laç, rreth një vit më parë.
Pista kryesore që ka ngritur policia është ajo e vrasjes për hakmarrje. 40-vjeçari rezulton një njeri me precedentë penalë në Angli. Ai akuzohet se ka vrarë një 22-vjeçar të identifikuar si Preng Marku në Angli.
