Kreu i Forumit Rinor Demokrat, Belind Këlliçi ka reaguar pas lajmit se në një godinë në Qytetin Studenti kishte rënë suvaja e tavanit. Sipas Këlliçit, tavani i godinës nr.20 ka rënë në të gjithë hapësirën e katit të tretë.
Ndër të tjera, ai shprehet se vajzat që banonin në këtë godinë janë nxjerrë jashtë, pa pasur një mbështetje.
“Reagimi i autoriteteve që e kanë mendjen për propagandë dhe të mbushin xhepat ka qenë: shkoni në hotel se nuk kemi ç’bëjmë. Studentët e prindërit e tyre paguajnë për konviktet dhe sërish detyrohen të paguajnë për hotel.
Ky është “pakti për universitetin” i Edi Ramës. 30 vajza që vijnë nga rrethe të ndryshme, të lëna jashtë pa asnjë mbështetje, në mes të natës. Kjo është puna e kësaj qeverie. Ky është standardi i Edi Ramës! Ndërton për show, mbush xhepat dhe pastaj gjithçka shkatërrohet. Fatmirësisht s’ka patur njeri në godinë në atë çast dhe nuk ka patur të lënduar. Këtij fakti duhet t’i gëzohemi të gjithë sot”, shkruan kryetari i FRPD-së.
Lidhur me këtë ngjarje, ish-deputetja e LSI-së, Nora Malaj shprehet se shtetit sot i ka rënë suvaja dhe i janë tronditur themelet.
“Kjo është rruga që të çon një “i çmendur, që të gjithë tashmë po i çmend”!! Këtë do ta thoshte me gojën plotë edhe i madhi Dritero, po të ishte mes të gjallëve, ndonëse e la me të shkruar thënien e tij lapidare “ një i çmendur të gjithë i çmend”, për situatën dhe grupin qeverisës “Çmenduria” që po na drejton”, theksoi Malaj.
