Ministria e Shëndetësisë njofton se një tjetër person ka humbur jetën si pasojë e koronavirusit në Shqipëri.
Sipas njoftimit të publikuar, bëhet fjalë për një grua 68-vjeçare nga Tirana. Ajo kishte 10 ditë e intubuar, ndërsa vuante edhe nga veshkat.
Kështu shkon në 24 numri i personave që kanë humbur jetën nga COVID-19 në Shqipëri. Deri më tani janë regjistruar gjithsej 467 raste infektimi, ndërsa 232 pacientë kanë arritur ta mposhtin virusin vdekjeprurës.
Njoftimi:
Ka ndërruar jetë sot në spitalin infektiv një paciente 68-vjeçare nga Tirana, me inicialet L.K., e cila trajtohej prej 10 ditësh në shërbimin Infektiv në gjendje të rëndë, e intubuar.
68-vjeçarja e prekur nga COVID19 vuante nga insufencenca renale dhe kishte kryer pesë seanca dialize brenda spitalit infektiv gjatë këtyre ditëve. Pavarësisht përpjekjeve maksimale të stafit mjekësor, 68-vjeçarja nuk ja doli të mbijetojë.
Ministria e Shëndetësisë dhe Mbrojtjes Sociale i shpreh ngushëllimet familjes së të ndjerës dhe u kërkon qytetarëve të vijojnë të respektojnë me shumë rigorozitet masat e distancimit fizik, si e vetmja mënyrë për të ndërprerë zinxhirin e transmetimit të infeksionit, për të parandaluar përhapjen e mëtejshme të COVID-19.
Betejën me këtë sëmundje e kanë humbur deri tani 24 qytetarë.
