Edhe shkolla “Emin Duraku”, ka pësuar dëme shumë serioze nga tërmeti i 26 nëntorit. Në sajë të kryerjes së akt-ekspertimit, rezulton se shkolla ka dëmtime serioze në strukturë, ç’ka është kërkuar që të pezullohet aktiviteti. Kjo çështje ka marrë vëmendjen e gazetarit Edi Oga, vajza e të cilit është nxënëse në këtë shkollë.
Me anë të një statusi në Facebook, ai njofton se shkolla ku studion vajza e tij është shpallur e papërshtatshme për frekuentin. Si prind, ai kërkon hetimin dhe vendosjen përpara përgjegjësisë së personave/institucioneve që kanë certifikuar sigurinë e këtyre godinave.
“Shkolla “Emin Duraku” ku mëson edhe vajza ime, është dëmtuar seriozisht dhe e shpallur e papërshtatshme për frekuentim. Nëse tërmeti do të kishte ndodhur në kohë mësimi, fëmijët mund ta kishin pësuar.
Si prind, kërkoj hetimin dhe vendosjen përpara përgjegjësisë së personave/institucioneve që kanë çertifikuar sigurinë e këtyre godinave. Pas kësaj, pres që të ndërhyhet profesionalisht për riparimin e saj dhe çertifikimin zyrtar”.
