Shkolla e Magjistraturës është institucioni i parë që vendos zyrtarisht vaksinimin si kusht për të gjithë studentët, apo kandidatët për magjistratë, që duan të jenë në auditoret në vitin e ardhshëm akademik. Shkolla e Magjistraturës ka nxjerrë një “urdhër” të fundit për të gjithë ata kandidatë, të cilët dëshirojnë që të studiojnë në vitin e ri akademik 2021-2022.
Në njoftimin zyrtar thuhet se çdo kandidat duhet që të depozitojë elektronikisht në sekretarinë mësimore, vërtetimin zyrtar, me qëllim që të jenë pjesëmarrës në trajnimin në auditor prej datës 4 tetor 2021 e në vijim.
“Njoftohen te gjithë kandidatet për magjistratë që studiojnë në Shkollën e Magjistraturës në vitin akademik 2021-2022, (viti i pare dhe viti i dyte i studimit), që për të siguruar mbarëvajtjen e programit të trajnimit fillestar përmes mësimit në auditor, te marrin masat e nevojshme për të kryer vaksinat anti-COVID.
Çdo kandidat te depozitoje elektronikisht në sekretarinë mësimore, vërtetimin zyrtar me qëllim që të jenë pjesëmarrës në trajnimin në auditor prej datës 4 tetor 2021 e në vijim. Ju kujtojmë qe muaji gusht është i hapur për vaksinimin e te gjitha grupmoshave mbi 18 vjeç”, thuhet në njoftimin e Shkollës së Magjistraturës.
Në 24 orët e fundit janë kryer 4.799 testime, nga të cilat kanë rezultuar pozitivë me Covid-19, 274 qytetarë. Aktualisht janë 1.752 pacientë aktivë me Covid-19 në të gjithë vendin. Në Spitalin Infektiv po marrin trajtim spitalor të specializuar 37 pacientë.
Burime zyrtare nga Ministria e Shëndëtësisë njoftojnë se janë shëruar 46 qytetarë gjatë 24 orëve të fundit, duke e çuar numrin e të shëruarve në 130.549 që nga fillimi i epidemisë.
